أكد أحمد حسام "ميدو"، عضو اللجنة الفنية بنادي الزمالك، أن قرار استبعاد أحمد سيد "زيزو" من مواجهة ستلينبوش الجنوب أفريقي لم يكن قرارًا فرديًا، بل جاء بالتشاور داخل لجنة التخطيط بالنادي، مشيرًا إلى أن الهدف الأساسي من القرار كان الحفاظ على تركيز المجموعة وعدم تشتيت الفريق.

وقال ميدو في تصريحات إعلامية: "استبعاد زيزو لم يكن قراري الشخصي، لكنه قرار لجنة التخطيط بالكامل. رأينا أن وجوده في المباراة كان من الممكن أن يشتت تركيز اللاعبين، خاصة في ظل الظروف الحالية".

وأضاف: "البعض يسأل: ليه زيزو بالتحديد؟ ليه مش لاعيب تاني؟ إحنا بقالنا فترة طويلة بنحاول نقعد مع زيزو ووالده بشكل رسمي، وقدمنا أكثر من عرض رسمي، لكن لم يصلنا أي رد واضح  آخر عرض رسمي اتبعت من 3 أسابيع، وكان عرض مميز جدًا، لكن للأسف مفيش رد نهائي لحد دلوقتي".

وأوضح ميدو : "الرد اللي جه لينا كان إن اللاعب له مستحقات، لكننا راجعنا كل التفاصيل وبعتنا مستندات توضح إن عليه جزء، وإحنا علينا جزء، كمان زيزو ظهر في إعلانات، وده بيستلزم نسبة للنادي، والأرقام كانت مختلفة عن الواقع".

وشدد ميدو: "أكيد زيزو كان هيساعدنا فنيًا لو شارك، لكن لو كنا استقبلنا هدف، كان أول هجوم هيكون عليه، وبالتالي القرار كان حماية للاعب وللمجموعة. بعض الناس قالت ليه مكنش على الدكة؟ لكن موقف زيزو مختلف تمامًا عن أي لاعب تاني زي مصطفى شلبي أو صلاح".

واختتم حديثه: "اللي يهمنا دلوقتي هو استقرار الفريق، وكل قراراتنا هدفها مصلحة الزمالك في المقام الأول".