رد المؤلف عبد الرحمن هيبة كاتب برنامج “قطايف”للفنان سامح حسين الذي عرض في موسم رمضان 2025 علي منتقدي الفنان سامح حسين بعد تصريحاته الأخيرة في احتفالية عيد الفطر، بحضور أبناء الشهداء من القوات المسلحة والشرطة المصرية، والتي قال فيها: "احنا شعب أبهر العالم بقدرته العجيبة على الضحك في أصعب المواقف وربنا خلقنا كده بنحب الضحك والفرحة، والعيد فرحة، ويا رب يكتر أفراحنا، بس مش ضروري نأخذ كل الأعياد دي إجازات وورانا شغل كتير أوي". 

عبد الرحمن هيبة يدافع عن الفنان سامح حسين

وكتب عبد الرحمن هيبة من حلال حسابه الرسمي عبر موقع التواصل الاجتماعي" فيسبوك "، وقال:" كلمتين لوجه الله وللمهتمين بالحقيقة والإنصاف ..
طول الشهر والناس بتنتقد سامح حسين وبتقوله اتكلم عن غـ.ـزة، ولما طلع اتكلم عن غـ.ـزة في مجمل كلامه عن الشهـ.ـداء قدام رئيس الجمهورية في يوم العيد، الناس سابت كل حاجة قالها ومسكت في إفيه رماه عشان يكسر جدية الموضوع ( بما إننا في العيد يعني ) وهووووب هات الراجل اللي طلعناه السما طول شهر رمضان عشان ننزله الأرض دلوقتي في العيد". 

وأضاف: "كل اللي الراجل قاله ربنا يكتر أعيادنا ( يعني يرزقنا بأيام جميلة نحتفل بيها طول السنة ) ومش لازم ناخدها كلها إجازات دا إفيه أقصى هجوم ممكن توجهه ليه انك تقول عليه مبيضحكش، أو إفيه قديم، لكن اني اشوف كل التقطيع دا في الراجل، وسب وطعن ولعن، علشان هزر بكلمة ( والهزار بالمناسبة كان في سياقه الطبيعي ) فدا تحفز أنا مش فاهم سببه بصراحة". 

وتابع:" هعمل أكتر حاجة بكرهها في حياتي يا جماعة للمرة التانية وهشرح إفيه اتقال على سبيل الهزار، والهزار فقط وانا شاهد على الكلام دا وربنا يعلم اني بقول الحقيقه". 

وقال: "سامح مكانش يقصد اننا نلغي الإجازات ولا أي حاجة من الكلام اللي بشوفه طول النهار دا، سامح كان بيقول ربنا يكتر أعيادنا ( ومش لازم ناخدها كلها إجازات ) يقصد الأعياد اللي لسه هتكتر، اللي بيتمناها، مش الأعياد الحالية". 

واستكمل:"ولو إنه كلام بديهي بس محتاج اشرحه تاني للأسف، علشان انا شايف واحد أعرفه شخصيا واشتغلت معاه، ومشوفتش منه غير كل أخلاق وتواضع واحترام". 

وتابع:" ومن أول لحظة نجحت فيها التجربة دي لحد دلوقتي سامح مكلمنيش مرة من غير ما يحذرني من الغرور، ومن إننا ننسى فضل ربنا علينا، أو نعمل أي حاجة تغضبه". 

وأضاف: "يعز عليا أوي أشوف كل الهجوم والتطاول دا عليه، لأنه ميستاهلش كدا ..والكلام دا زي ما قلت في أول البوست موجه للمهتمين بالحق والإنصاف، واللي معندهمش مشكلة يغيروا فكرتهم لو عرفوا الحقيقة، أما المتحفزين للهجوم أنا ماليش كلام معاهم لأن مفيش أي حاجة هتغير موقفهم". 

وأختتم:" وكل حرف انا كتبته في البوست دا أنا مسؤول عنه مسؤولية تامة، والله على ما أقول شهيد .. وكل سنة و حضراتكم طيبين".